Tupa avatangiisinillu tupatorfiunngitsunik isumannaarineq, kiisalu tupanik nioqqutissat nalunaaqutserneqartarneri pillugit Inatsisartut peqqussutaat nr. 4, 23. maj 2000-imeersoq.
Kalaallit Nunaanni Peqqinnissamik Isumaginnittoqarfik pillugu inatsimmi 369-imi, ulloq 6. juni 1991-imeersumi § 1 malillugu aalajangersarneqarput:
Kapitali 1.
Siunertaa atuuffialu§ 1. Peqqussutip siunertaraa tupatornerup annikillisinneqarnissaa kiisalu tupatornerup peqqinnermut ajoqusiisumik sunniutigisartagaasa pinaveersaartillugillu killilernissaat.
§ 2. Peqqussummi pineqarput nioqqutissat tamarmik tupap naasuanit (Nicotianamit) suliarineqarsimasut, tassunga ilanngullugit sikaritsit, sikaat, sikariilorsit, serutsit, tupat pujortaammik pujortagassiat, tupat imusassiat, sunoorsit sukuluussallu il.il.
§ 3. Avatangiisit pujortarfiunngitsut pillugit peqqussummi kapitali 2-mi malittarisassat Namminersornerullutik Oqartussanut kommuninullu, tassunga ilanngullugit suliffiit taakkua ingerlataat aamma Namminersornerullutik Oqartussat suliffeqarfiutaat namminersortitat, taamaallaat atuupput.
Imm. 2. Kapitali 2-p aammattaaq ingerlatseqatigiiffinnut, suliffeqarfinnut il.il. pisortat inatsisit tunngavigalugit ingerlatsiviinut ilaasutut taaneqarsinnaanngitsunut erseqqinnerusumik taaneqarqartunut atuutsinneqarnissaa pillugu malittarisassanik Naalakkersuisut aalajangersaasinnaapput. Tamannali aatsaat atuuppoq pineqartut ingerlatsinerminni aningaasartuutaat annerusumik Namminersornerullutik Oqartussanit kommuninilluunniit matussuserneqartarpata, imaluunniit ingerlatseqatigiiffiit, suliffeqarfiit il.il. taakkunannga annertunerusumik pigineqarpata.
Kapitali 2.
Avatangiisit pujortarfiunngitsut§ 4. Pujortarneq inerteqqutaavoq inini kikkunnilluunniit orninneqarsinnaasuni.
Imm. 2. Taamaattorli inini pujortartarfittut immikkut aaqqissuussani, imaluunniit init pujortartarfiusut immikkut pilersinneqarsinnaanngippata pujortartarfiusussatut immikkut nalunaaqutserluarsimasuni, pujortartoqarsinnaavoq.
Imm. 3. Inini immikkut pujortartarfiusuni imaluunniit pujortartarfiusussatut immikkut nalunaaqutserluarsimasuni sapinngisamik putsup akornutaanera annikinnerpaatinneqassaaq.§ 5. Angallassissutini kikkunnit tamanit atorneqartartuni pujortarneq inerteqqutaavoq.
Imm. 2. Taamaattorli umiarsuarni aalajangersimasunik ingerlavilinni pujortartarfiit imaluunniit pujortarfiusinnaasut immikkut nalunaaqutserluakkat pilersinneqassapput, aamma takuuk § 4, imm. 3
Imm. 3. Nunanut allanut nunanillu allanit aqqutit peqqussummi matumani ilaatinneqanngillat.§ 6. Ini suliffiusoq inummit ataasiinnaanngitsumit suliffiuppat pujortartoqaqqusaanngilaq, taamaattorli init pujortartarfiit pujortarfiusinnaasullu immikkut nalunaaqutserluakkat pilersinneqassallutik, aamma takuuk § 4, imm. 3.
Imm. 2. Napparsimmaviit, ilinniarfiit, atuarfiit kiisalu ulluunerani aamma ulloq unnuarlu paaqqinnittarfiit eqqarsaatigalugit aalajangerneqarsinnaavoq pujortarneq inerteqqutaasoq.
Imm. 3. Ataatsimiinnerni pujortarneq inerteqqutaavoq.§ 7. Sumiiffiit, § 4, imm. 1, § 5, imm.1 imaluunniit § 6, imm. 2 malillugu malittarisassiat tunngavigalugit pujortarnermik inerteqquteqarfiusut, nalunaaqutserneqarsimasassapput nalunaarlugu sumiiffimmi pineqartumi pujortarneq inerteqqutaasoq.
Imm. 2. § 4, imm. 2, § 5, imm. 2 aamma § 6, imm. 1 naapertorlugit init sumiiffiilluunniit pujortarfiusinnaasut, nalunaaqutserneqarsimasassapput nalunaarlugu sumiiffimmi pineqartumi pujortartoqarsinnaasoq.
Kapitali 3.
Tupat piseqqusaarutigineqarneri§ 8. Atuagassiatigut, allagarsiussatigut allatigulluunniit tupanik piseqqusaarilluni ussassaaruteqarneq inerteqqutaavoq.
Imm. 2. Malittarisassamut nunat allamiut aviisii, atuagassiaat, aviisii assiliartallit assigisaallu eqqunneqartut immikkortoq 1-mi ilaatinneqanngillat.§ 9. Tupanik misiligutissanik akeqanngitsumik agguaaneq inerteqqutaavoq.
§ 10. Peqqussummi uani tupanik piseqqusaarilluni ussassaarinernut sunulluunniit inerteqquteqarneq sanioqqunneqassanngilaq taarsiullugu nalunaaqutsersuutit, saqqarmiut, ilisarnaatit allatulluunniit takussutissiat atornerisigut.
Kapitali 4.
Tupanik nioqqutissiat pillugit allagartalersuisarneq nalunaaqutsersuisarnerlu§ 11. Sumiiffimmi tupanik nioqqutissianik tuniniaaviusuni, allagartalersuisoqassaaq nalunaarlugu tuniniaavik pineqartoq inunnut 18-it inorlugit ukiulinnut tupanik niqqutissianik tuniniaasarnersoq, imaluunniit taamaallaat inunnut 18-ileereersimasunuinnaq tuniniaasarnersoq.
§ 12. Tupat tamarmik tupanik nioqqutissanik atuinerup peqqinnissamut peqqinnermullu navi-anartumik sunniuttarneranik mianersoqqussummik erseqqissumik nalunaaqutserneqarsimassapput. Mianersoqqussutit kalaallisut danskisullu allassimassapput.
Imm. 2. Peqqussummut matumunnga ilanngussami mianersoqqussutit atorneqarsinnaasut nalunaarneqarput.
Imm. 3. Ilanngussami taaneqartut saniatigut oqaasertaliussat Peqqinnissamut Pisortaqarfimmit akuerineqarlutik atorneqarsinnaapput.§ 13. Tupanik nioqqutissiat tamarmik akuinik (usserut) aamma nikotinimik qanorlu annertutiginerinik paasissutissartaqartinneqassapput.
Kapitali 5.
Pineqaatissiisarnerit§ 14. § 5, imm. 2, § 6, imm. 1 aamma § 7 naapertorlugit Namminersornerullutik Oqartussat kommunillu, tassunga ilanngullugit taakku suliffeqarfiutaat aamma Namminersornerullutik Oqartussat suliffeqarfiutaat namminersortitat taakkuninnga unioqqutitsisut akiliisitaasussanngorlugit eqqartuunneqarsinnaapput.
Imm. 2. § 8, imm. 1-imi aamma §-ini 9-miit 13-imut aalajangersakkanik unioqqutitsinermi akiliisitaasussanngortitsilluni eqqartuussisoqarsinnaavoq.
Imm. 3. Aktiaateqarluni ingerlatseqatigiiffik, piginneqataassuteqarluni ingerlatseqatigiiffik, piginneqatigiiffik taamaaqataalluunniit imm. 2-mi ilaatinneqartumik unioqqutitsippat ingerlatseqatigiiffik immini unioqqutitsinermut akisussaatinneqarsinnaavoq. Namminersornerullutik Oqartussat, kommuni imaluunniit kommunit ataatsimoorlutik ingerlassaqarfii Kommunalbestyrelsit, nunaqarfinni aqutsisut il.il. pillugit Inatsisartut inatsisaanni § 64-imi ilaatinneqartut unioqqutitsippata, Namminersornerullutik Oqartussat, kommunalbestyrelsi imaluunniit kommunit ataatsimoorlutik ingerlassaqarfii taamatut akiliisitaasussanngorlugit akisussaatinneqarsinnaapput.
Imm. 4. § 3, imm. 2 naapertorlugu malittarisassanik atortuulersitsinermi imm. 1 taamatulli atuutissaaq.
Kapitali 6.
Atuutilerfia§ 14. Inatsisartut peqqussutaat ulloq 1. august 2000 atuutilerpoq.
Imm. 2. Peqatigitillugu Tupa avatangiisinillu tupatorfiunngitsunik isumannaarineq, kiisalu tupanik nioqqutissat nalunaaqutserneqartarneri pillugit inatsisartut peqqussutaat nr. 5, 3. november 1994-imeersoq atorunnaarsinneqarpoq.
Namminersornerullutik Oqartussat, ulloq 23. maj 2000
Jonathan Motzfeldt/
Alfred Jakobsen
Ilanngussaq
1) Pujortarneq kræfteqalissutaasarpoq Peqqinnissamut Pisortaqarfik
Rygning er årsag til kræftDirektoratet for Sundhed
2) Pujortarneq uummatikkut taqqatigullu nappaateqalissutaasarpoq Peqqinnissamut Pisortaqarfik
Rygning er årsag til hjerte- og karsygdommeDirektoratet for Sundhed
3) Pujortarnerit allanut akornutaavoq Peqqinnissamut Pisortaqarfik
Rygning generer dine omgivelserDirektoratet for Sundhed
4) Naartuguit pujortarlutillu naartut ajoqusersinnaavat Peqqinnissamut Pisortaqarfik
Hvis du er gravid og ryger, kan det skade dit barnDirektoratet for Sundhed
5) Maligassiuilluarit - meeqqat pujortarfiginaveersaakkit Peqqinnissamut Pisortaqarfik
Vær et godt eksempel - udsæt ikke dine børn for tobaksrøgDirektoratet for Sundhed
6) Tupa peqqissutsimut akornutaalluinnarpoq Peqqinnissamut Pisortaqarfik
Tobak er yderst sundhedsskadeligDirektoratet for Sundhed